ماهي المثلية الجنسية وواقعها بيننا

 ازاي أكون محامي متميز ؟ 

عباس العقاد له مقولة بتقول " اقرأ كل يوم ولن تنام بنفس العقل الذي استيقظت به " 

١- القراءة.

أول وأهم شئ بيميز المحامي الناجح ثقافته وأهم منبع للثقافة هي القراءة، والمقصود هنا مش بس الكتب القانونية بل كمان الكتب العلمية في جميع العلوم والروايات الأدبية اللي هتوفر لك أرضية ثقافية صلبة لا يستهان بها. 

٢- اصنع مكتبتك بإيدك.

لازم علي الأقل تضيف لمكتبتك كتابين شهريا كتاب قانوني وكتاب تاني في غير مجالك، أعرف ناس لازم علي الأقل تقرأ 4 كتب شهريا بمعدل كتاب كل اسبوع. 

حاول تدخر مبلغ بسيط شهريا وانزل اشتري كتاب ومع الوقت هتعرف ليه. 

٣- الإهتمام باللغة العربية. 

ودي أكتر مشكلة بتواجه محامين كتير بل بعضهم بيكون محامي نقض ولسة عنده أخطاء إملائية. مينفعش تكون كاتب مذكرة أو صحيفة دعوي عظيمة قانونيا لكن كلها أخطاء املائية .. وفي كتب بسيطة جدا بتعلم قواعد النحو والكتابة بطريقة صحيحة ممكن نتكلم عنها في بوست تاني. 

٤- الكتابة علي الكمبيوتر. 

مينفعش نكون وصلنا لكل التطور التكنولوجي ده ولسة فيه محامين بتكتب صحف الدعاوي بخط إيديها، في اختراع اسمه برنامج الWord لازم لازم لازم تتعلم تكتب علي الكمبيوتر. 

٥- أرشيف القضايا. 

لو انت شغال في مكتب أو حتي مكتبك هتلاقي عندك كنز اسمه الملفات المحفوظة أو القضايا والدعاوي اللي شغلها خلص، امسك كل يوم أو يومين ملف في قضية مختلفة شوف ازاي الصحيفة والمذكرة اتكتبوا وشوف محضر الشرطة وتحقيقات النيابة وكمان الأحكام وشوف القاضي استند لإيه في حكمه. 

شوف خط سير القضية ابتدي ازاي ووصل لفين وايه الثغرات اللي كانت موجوده في القضية. اوعدك الخطوة دي هتديك أرض قانونية صلبة في وقت قصير.